په بدخشان کې ولسي سرچینې وايي چې د طالبانو په ډزو کې د وژل شویو احتجاج کوونکو شمېر درېیو کسانو ته لوړ شوی دی.
سرچینو دوشنبه د غويي پر ۲۴مه ورځپاڼې ته ویلي چې طالبانو د ارګو ولسوالۍ په چنار برلاس سیمه کې پر اعتراض کوونکو ډزې کړې دي.
سرچینو زیاته کړې چې د ټپيانو شمېر هم ۲۵ تنو ته پورته شوی دی.
سرچینې وايي چې درې وژل شوي کسان زیدالله بای، مراد بای او حاجي عبادالله نومېدل.
د سرچینو په وینا، طالب سیمهییز چارواکي په چورلکه کې له ارګو وتلي او د دغې ډلې جنګیالي هم د بدخشان مرکز فیضاباد ته ستانه شوي.
سرچینو زیاته کړې چې د ارګو ولسوالۍ په قرهکمر او شمقارچي سیمو کې د طالبانو او احتجاج کوونکو ترمنځ نښته شوې ده.
د سرچینو په خبره، په دې سیمو کې هم اعتراض کوونکي ټپيان شوي؛ خو شمېر یې څرګند نه دی.
له دې وړاندې سرچینو ویلي و چې د طالبانو له خوا پر اعتراض کوونکو د ډزو په پاېله کې ۱۳ کسان ټپيان شوي و.
طالبانو تر دې دمه په دې اړه څه ویلي نه دي.
د یادونې ده چې له دې وړاندې هم د ارګو او درایم ولسوالیو اوسېدونکو د طالبانو پر وړاندې اعتراض کړی و.
احتجاج کوونکو پرلپسې د طالبانو پر وړاندې شعارونه ورکول او د دغې ډلې له ځواکونو یې غوښتل چې له سیمو یې ووځي.
