د افغانستان په چارو کې د امریکا ځانګړي استازي ټوماس وېسټ په افغانستان کې د یوناما له مرستیال او د ملګرو ملتونو د بشري مرستو له همغږي کوونکي اینډریکا راتواته سره د لیدنې خبر ورکړی دی.
وېسټ د سېشنبې شپه، د لیندۍ په ۲۸مه په اېکس پاڼه کې لیکلي چې دوی د افغان کډوالو د ملاتړ، په افغانستان کې د بشري او اقتصادي وضعیت په هکله خبرې اترې کړې دي.
توماس وېسټ په افغانستان کې په دغو برخو کې له یوناما سره د واشنګټن د همکاریو د دوام ډاډ ورکړی دی.
د افغانستان لپاره د امریکا ځانګړي استازي تر دې وړاندې متحده عربي اماراتو، سعودي عربستان، قطر او پاکستان ته هم سفرونه ګکړي وو.
وېسټ په سعودي عربستان کې د افغانستان لپاره د اسلامي هېوادونو د همکارۍ سازمان له ځانګړي استازي طارق علي بخت سره د اقتصادي ننګونو، د افغان کډوالو ملاتړ او د بشري حقونو په ځانګړي ډول د افغان ښځو او نجونو په اړه خبرې کړې دي.
