د امریکا استازو جرګې د چهارشنبې په ورځ د لېندۍ په ۲۲مه رسمأ د امریکا د ولسمشر جوبایډن د استیضاح په اړه د څېړنې لپاره هوکړه وکړه.
دغه څېړنه د دې لپاره کېږي، چې معلومه کړي ایا جوبایډن د خپل زوی هانټر بایډن په سوداګریزو معاملو کې ناوړه ګټه اخیستې که څنګه؟
له دغو څېړنو څو ساعته وړاندې هانټر بایډن چې په مالياتي سرغړوونو تورن دی، د تړلو دراوزو ترشا کمیټې ته له شهادت ورکولو ډډه وکړه.
سپینې ماڼۍ دغه څېړنه رد کړې ده او هغه یې نه ثابتېدونکې او تشه سیاسي انګېزه بللې.
د امریکا د استازو جرګه چې د جمهوري غوښتونکو په واک کې ده، د ۲۲۱ مثبتو او ۲۱۲ مخالفو رایو سره د بایډن پر وړاندې د لګېدلیو تورونو په اړه د څېړنې اجازه ورکړه.
د امریکا په استازو جرګه کې جمهوري غوښتونکي ادعا کوي، چې جوبایډن او کورنۍ یې د بارک اوباما د مرستیالۍ پرمهال په ۲۰۰۹ تر ۲۰۱۷ کلونو کې د هغه له دریځه ګټه پورته کړې.
د امریکا د ولسمشر ۵۳ کلن زوی هانټر بایډن ویلي، هیڅ داسې اسناد نه شته چې دا ثابته کړي چې پلار یې د هغه په سوداګریزو چارو کې ښکېل و،« ځکه چې داسې کوم څه نه دي شوي».
