د سویلي چین سهار ورځپاڼې راپور ورکړی چې د طالبانو تر واک لاندې په افغانستان کې «اسلامي افراطیت او ترهګري» یو ځل بیا د پراخېدو په حال کې ده.
دغې ورځپاڼې یکشنبه، د کب پر ۶مه لیکلي چې که طالبان د مشروعیت او رسمیت پېژندلو غوښتونکي دي، باید «القاعدې» سره اړیکې پرې کړي.
د دغه راپور پر بنسټ، د طالبانو تر واک لاندې ترهګر د «غوړېدو» په حال کې دي.
په راپور کې راغلي چې طالبان د تحریک طالبان پاکستان (ټيټيپي) او تحریک جهاد اسلامي پاکستان (ټيجيپي) سره هم اړیکې لري او په هغه هېواد کې ترهګریز بریدونه ترسره کوي.
پردې سربېره، د سویلي چین سهار ورځپاڼې د ملګرو ملتونو د امنیت شورا وروستی راپور راخیستی او لیکلي یې دي چې افغان طالبان د پاکستاني طالبانو «خواخوږي» دي او دغې ډلې ته د مرستو کڅوړې او پوځي تجهیزات استوي.
د يادونې وړ ده چې څو ورځې وړاندې د ملګرو ملتونو امنيت شورا د بنديزونو د څېړنې او څارنې ټیم راپور ورکړی و چې د طالبانو او القاعدې ترمنځ اړيکې لا هم نږدې دي او دغې شبکې په افغانستان کې اته نوي روزنيز کمپونه جوړ کړي دي.
د دغه راپور له مخې، د القاعدې څلور کمپونه د پروان، غزني، لغمان او اروزګان په ولایتونو کې موقعیت لري او دغې شبکې په پنجشیر کې د وسلو یو ګودام هم جوړ کړی دی.
ورته مهال، طالبانو تل دا ډول ادعاوې رد کړې دي.
