د «فریډم نو» په نوم د بشري حقونو یو بنسټ یو ځل بیا د طالبانو له بنده له قېد او شرط پرته د منیژې صدیقې د خوشې کېدو غوښتنه کړې ده.
یاد بنسټ چهارشنبه د کب پر ۲مه په خپله ایکسپاڼه کې لیکلي چې طالبانو څلور میاشتې وړاندې منيژه صدیقي له خپل کوره بیولې وه.
دغه بنسټ زیاته کړې: «هغه د ربړونې او ناوړه چلن له ګواښ سره مخامخ ده. موږ یې له قېد او شرط پرته په امنه توګه د ژر خوشې کېدو غوښتنه کوو.»
منیژه صدیقي چې د معترضو ښځو د غورځنګ غړې ده، د روان کال د تلې پر ۱۷مه د کابل په خېرخانې کې له نیول کېدو وروسته زندان ته لېږل شوې ده.
څه موده وړاندې سرچینو رسنی ته ویلي و چې مېرمن صدیقي شاوخوا یوه اوونۍ د ناوړه روغتیايي وضعیت له کبله د طالبانو په امنیت روغتون کې بستر وه.
له دې وړاندې د بښنې نړیوال سازمان له ذبیحالله مجاهد، د طالبانو د بهرنیو چارو وزارت او استخباراتو له ریاست څخه غوښتي و چې مېرمن صدیقي له قېد او شرط پرته خوشې کړي.
