د طالبانو د اطلاعاتو او کلتور وزارت ویلي چې د دې ډلې اړوند امنیتي ادارې او د بهرنیو چارو وزارت د بهرنیو سیلانیانو د امنیت، د ویزو اسانتیا، او سیاحتي خدمتونو د پراخوالي په تړاو غونډه کړې ده.
په دې ناسته کې د ګرځندوی انسټیټیوټ فعالیتونو ته د پیاوړتیا، د هوټلدارۍ سکتور ملاتړ، او د تفریحي سیمو ورپېژندنې په اړه هم بحثونه شوي دي.
طالب چارواکي وایي، هڅه کوي چې افغانستان د بهرنیو سیلانیانو لپاره خوندي او جذاب مقصد وګرځي.
دا هڅې په داسې حال کې کېږي چې له یو شمېر نړیوالو، سیاحتمحور ادارو سره د طالبانو تعامل تر اوسه محدود پاتې شوی، خو دوی وایي چې د سیاحت له لارې غواړي مثبت نړیوال تصویر جوړ کړي او اقتصادي فرصتونه رامنځته کړي.
