طالبان د پکتیکا په انګور اډه کې له خلکو غوښتي چې خپل کورونه پرېږدي

د پکتیکا ولایت د انګور اډې اوسېدونکي وايي طالبانو له هغوی غوښتي، چې د سیمې د ناامنۍ او د احتمالي جګړې له کبله خپل کورونه پرېږدي.

د طالبانو اړوند رسنیو ویلي، د خلکو له وتلو وروسته د دې ډلې ځواکونه په سیمه کې ځای پر ځای شوي او د جګړې لپاره په بشپړ ډول چمتو دي.

دا پرېکړه د افغانستان او پاکستان ترمنځ د وروستیو نښتو له زیاتېدو وروسته شوې ده.

سیمه‌ییزې سرچینې وایي، د دواړو لورو ترمنځ د نښتو احتمال لا هم شته او خلک له یوې بلې جګړې وېره لري.