نورلان یرمکبایوف، د شانګهای سرمنشي ویلي دي چې په افغانستان کې لا هم ټولنیزې ستونزې شته، د ښځو حقونه نه ورکول کېږي او ترهګري شتون لري.
هغه ټینګار وکړ چې د سازمان ټول غړي هېوادونه د طالبانو له ادارې سره همکاري کوي او د افغانستان وضعیت له نژدې څاري، ترڅو د بشري، اقتصادي او ټولنیزو ننګونو په حل کې مرسته وشي.
یرمکبایوف زیاته کړې چې د سازمان د مشرانو د شورا په اعلامیه کې د ۲۰۲۴ کال د جولای پر۴مه نېټه ټینګار شوی چې د ټولو قومي او سیاسي ډلو په ګډون د یوه ټولګډونه حکومت جوړېدل د تلپاتې سولې او ثبات یوازینۍ لاره ده.
دغه څرګندونې د چین په شمالي ښار تیانجین کې د راتلونکې سترې غونډې په څنډه کې شوي، چې د اګست له ۳۱مې څخه د سپټمبر تر لومړۍ نېټې پورې به دوام ولري.
