د فراه ولایت ځایي چارواکی وایی، په دغه ولایت کې د دوو کورنیو د غړو ترمنځ د نښتې په پایله کې درې کسان وژل شوي او دوه نور ټپیان شوي دي.
د فراه ولايت د پرچمن ولسوالۍ لپاره د طالبانو ولسوال محمد ياسين ابودجانه چهارشنبه د غبرګولي پر٣٠مه ویلي چې دا پېښه د لوى اختر په لومړۍ ورځ د دې ولسوالۍ په «بشنګ» کلي کې شوې ده.
د دغه طالب چارواکي په وینا، د دې پېښې په وژل شویو کسانو کې یو سړی، یوه ښځه او یو ماشوم شامل دي.
طالبانو زیاته کړې، چې د دې پېښې عاملان هلمند ولایت ته تښتېدلي او د نیولو هڅې یې روانې دي.
د طالبانو ډلې تر اوسه د دغو دوو کورنیو ترمنځ د نښتې د لامل په تړاو څه نه دي ویلي.
د وري مياشتې په وروستۍ اوونۍ کې په نورستان کې د دوو کورنيو د غړو ترمنځ د نښتې له امله درې تنه ووژل شول.
