د ملګرو ملتو سرمنشي انتونیو ګوترېش، هغه څه چې د طالبانو تر کنټرول لاندې افغانستان کې پېښېږي د د معاصر تاریخ له ځینو ځپوونکو رژیمونو سره پرتله کړي دي.
ګوترېش دا موضوع یکشنبه د تلې پر ۸مه، اېکس ټولنیزه پاڼه کې د خپاره کړي پیغام له لارې مطرح کړې ده.
هغه زیاته کړې: «هغه څه چې په افغانستان کې پېښېږي، کولای شو په معاصر تاریخ کې یې له ځینو ځپوونکو رژیمونو سره پرتله کړو.»
د ملګرو ملتونو سرمنشي همداراز د هېوادونو او نړیوالو سازمانونو د هغې پرېکړې چې پر افغان ښځو او نجونو د طالبانو لګېدلي محدودیتونه لېرې کوي، ملاتړ کړی دی.
د ملګرو ملتونو نوموړي چارواکي یو ځل بیا له طالبانو غوښتي چې سملاسي دا بندیزونه لېرې کړي.
دا څرګندونې په داسې حال کې کېږي چې تېره اوونۍ د جرمني، اسټرالیا، کاناډا او هالنډ په ګډون څلورو هېوادونو اعلان وکړ چې په افغانستان کې د طالبانو له خوا د «جنسیتي تبعیض» له کبله د هاګ په نړیواله محکمه کې د دغې ډلې پر ضد شکایت ثبتوي.
