د تېر حکومت يو شمېر واليانو د طالبانو د بهرنيو چارو له وزير اميرخان متقي سره لیدلي او د هېواد له روان وضعيت یې رضایت ښودلی دی.
د طالبانو د بهرنيو چارو وزارت د وياند مرستيال احمد ضياء حافظ، سېشنبه د چنګاښ پر ۲۶مه په خپله اېکسپاڼه کې ليکلي چې دې واليانو له طالبانو سره د همکارۍ ژمنه کړې ده.
امیرخان متقي په دې ناسته کې بهرمېشتو پخوانیو افغان چارواکو ته بلنه ورکړې چې هېواد ته راستانه شي.
تر دې مخکې هم د تېر حکومت یو شمېر پوځي څېرو د طالبانو له دفاع وزیر سره لیدلي وو او د همکارۍ ژمنه یې کړې وه.
طالبان په داسې حال کې د تېر حکومت چارواکو ته بلنه ورکوي چې دا ډله د جمهوري نظام د پوځیانو او شخصیتونو په نیولو او شکنجې تورنه ده.
