د طالبانو د غړو په منځ کې په ځانګړې توګه د افغانستان له پولو بهر د جهاد په اړه داخلي کړکېچونه او اختلافات یو ځل بیا روښانه شوي دي. په وروستۍ پېښه په ننګرهار کې د طالبانو د دیني مدرسې مشر ملا سلطان محمد ثاقب په ټوله نړۍ کې لهجهادڅخه دفاع وکړه او له افغانستان څخه بهر د جهاد د مشروعیت د نشتوالی په اړه د ځینو طالب چارواکو څرګندونې یې په بشپړه توګه ناسمې بللی دی.
هغه د فلسطین او بیت المقدس وضعیت ته په اشارې سره پر وسله والو طالبانو غږ وکړ چې خپل جهادي فعالیتونه د افغانستان له پولو هاخوا پراخ کړي. ثاقب دغه راز د ملا فضل الرحمن د بېلګې په توګه یادونه وکړه چې په افغانستان کې یې جهاد روا ګڼلی او دا نظر یې د طالبانو د اوسنۍ کړنلارې په پرتله د غوره دریځ په توګه وړاندې کړی دی.
ظاهراً دغه څرګندونې د طالبانو د دفاع د وزیر ملا یعقوب له خبرو سره په مخالفت کې شوې دي. ملا یعقوب د تېر کال د سرطان په میاشت کې اعلان وکړ چې که څوک د جهاد په نیت له افغانستانه بهر شي، د هغه کار ته جهاد نه ویل کېږي. هغه ټینګار وکړ چې د طالبانو غړي باید د جهاد په نیت له افغانستانه بهر له تګ څخه ډډه وکړي او په هېواد کې دننه د طالبانو له نظام څخه ملاتړ وکړي. يعقوب څرګنده كړه چې په پرمختللو علماوو او معتبرو كتابونو كې راغلي دي چې كله چې امير مجاهدين له جګړې منع كړي، د هغوى عمل جهاد نه بلل كيږي.
دا اختلافات په داسې حال کې څرګندیږي، چې له افغانستانه بهر په بریدونو کې د طالب جنګیالیو رول هم تر سترګو شوی دی. په تېرو میاشتو کې د فلسطین په جګړه کې د طالبانو د حضور په اړه ناتایید شوي راپورونه خپاره شوي او په تېره بیا پاکستاني امنیتي چارواکو اعلان کړی چې دوه افغان طالب جنګیالي د خیبر پښتونخوا په بنوۍ سیمه کې په یوه برید کې لاس درلود . دغه برید چې د حافظ ګل بهادر ډلې د جنګیالیو له خوا ترسره شو، په پایله کې د پاکستان د پوځ اته سرتېري ووژل شول. پاکستاني امنیتي سرچینو ویلي، چې په دغو جنګیالیو کې یو یې د لوګر ولایت د څرخ ولسوالۍ اوسېدونکی فضل عمر او بل یې عثمان الله کامران د افغان طالبانو غړی و.
د کارپوهانو په اند دغه اختلافات او پېښې ښيي چې طالبان د خپل داخلي یووالي په اړه له جدي فکري ننګونو سره مخ دي. په داسې حال کې چې د طالبانو په منځ کې ځینې څېرې له افغانستانه بهر د جهاد پر پراخولو ټینګار کوي، د دغې ډلې ځینې چارواکي هڅه کوي چې جنګیالي وهڅوي چې کورنیو مسایلو ته پام وکړي او د طالبانو د رژیم ملاتړ وکړي. دا توپیرونه نه یوازې د طالبانو په منځ کې ایډیالوژیکي کړکیچونه په ګوته کوي، بلکې د دې ډلې په عملیاتي ستراتیژیو او نړیوالو اړیکو هم مهمې اغیزې لرلی شي.
له بلې خوا، د موجوده تاوتریخوالی او په بهرنی بریدونو کې د طالبانو د رول په پام کې نیولو سره، د دې ډلې راتلونکی او وړتیا چې داخلی همغږی وساتی او بهرنی ننګونو ته ځواب ووایی تر پوښتنې لاندې دی.
