د بلخ ولایت د طالبانو د والي دفتر اعلان کړی چې د ازبکستان په مالي ملاتړ به په مزارشریف ښار کې د شپږ مېلیونه ډالرو په لګښت یوه ستره ديني مدرسه جوړه شي.
د خبرپاڼې له مخې، دغه پروژه به په څلورو برخو کې عملي کېږي چې لومړۍ برخه یې اوس بشپړه شوې ده. د طالبانو د ریاست الوزرا اقتصادي مرستیال ملا عبدالغني برادر د یادې پروژې د کار څارنه کړې ده.
د طالبانو د واکمنېدو وروسته، په افغانستان کې د نجونو پر مخ ښوونځي او پوهنتونونه تړل شوي او پر ځای یې د دیني مدرسو د جوړېدو لړۍ چټکه شوې ده.
د پوهنې وزارت په وینا، یوازې په تېرو دریو کلونو کې شاوخوا ۲۳ زره مدرسې جوړې شوې چې له ۳۰۰ زرو ډېر زدهکوونکي پکې شامل شوي دي.
شنونکي وایي، د ازبکستان ملاتړ له دې امله دی چې د منځنۍ اسیا د مذهبي افراطیت د خپرېدو وېره لري، خو په عین حال کې دا مدرسې د افراطي ډلو د روزنې لپاره یو مناسب چاپېریال بلل کېږي.
