مارګریتا، یوه ۳۳ کلنه الماني ګرځندوې، په طالبانو واکمن افغانستان کې له محرم پرته درې میاشتنی سفر کړی او د دې سفر ویډیوګانې یې په ټولنیزو رسنیو خپرې کړي دي.
دې ویډیوګانو د افغانانو په ځانګړي ډول د ښځو غبرګونونه راپارولي، ځکه چې طالبانو په کورني ژوند کې د ښځو پر تګ راتګ سخت بندیزونه لګولي دي.
مارګریتا هڅه کوي افغانستان د یوې خوندي او ارامه سیمې په توګه وښيي، خو د ډېرو نظرونه بیا مخالف دي او دغه ویډیوګانې د طالبانو د سخت دریځې واکمنۍ حقیقت پټولو هڅه ګڼي.
طالبانو له واک ته رسېدو وروسته ښځو ته د زده کړو او کار کولو پراخ محدودیتونه وضع کړي دي او له محرم پرته د ښځو ګرځېدو بندیزونه لګولي دي.
په داسې حال کې چې مارګریتا د افغانانو د ژوند طریقه ستایي او ځان په دې هېواد کې خوندي احساسوي، افغانې ښځې لا هم له تعلیمي او ټولنیزو حقونو محرومې پاتې دي.
نړیوالې ټولنې او بشري سازمانونه پر طالبانو غږ کوي چې د ښځو حقونو ته باید درناوی وشي او دوی له زده کړو او ټولنیزې برخې اخیستو څخه بې برخې نه کړل شي.
