سیمهییزې سرچينې په ننګرهار ولايت کې د طالبانو له لوري د يوه ديني عالم د نيولو خبر ورکوي.
سرچينې رسنی ته منلې چې دغه ديني عالم محسنالله نومېږي او د یکشنبې ورځ، سلواغې پر ۱۵مه د چپرهار ولسوالۍ په «دولتزو» کلي کې د طالبانو له لوري نيول شوی دی.
د سرچینو په وینا، محسنالله د تېرې جمعې د لمانځه په خطبه کې د طالبانو پر رژیم نیوکې کړې وې.
سرچینه زیاتوي چې دوې ورځې وروسته د طالبانو استخباراتي ځواکونو دغه دیني عالم نیولی او د یوه «فولډر» ډوله موټر په وسیله یې ناڅرګنده ځای ته لېږدولی دی.
طالبانو تر اوسه په دې اړه څه نه دي ویلي.
طالبانو په تېرو دوو کلونو کې د هېواد په بېلابېلو ولايتونو کې د دغې ډلې پر رژيم د نيوکې له امله ګڼ شمېر کسان نيولي او شکنجه کړي دي.
په وروستۍ پېښه کې دغې ډلې درې ورځې وړاندې د کندز ولایت د جامع عرضبیګي جومات خطیب مفتي عبدالشکور حنیف چې د جومات امام او په مدرسه کې یې تدریس کاوه نیولی دی.
مفتي عبدالشکور طالبان په قوم پالنې، ظلم او د هېواد پر بې وزلو وګړو د ناقانونه مالیاتو په زیاتولو تورن کړي وو.
