منابع محلی در ولایت غور از گیرماندن مسافران در بند باین این ولایت و عدم همکاری طالبان خبر می‌دهند. منابع روز سه‌شنبه، ۸ حوت می‌گویند که شماری از باشنده‌گان ولسوالی‌های غور که قصد سفر به شهر فیروزکوه، مرکز این ولایت را داشتند به دلیل برف‌باری در ساحه بند باین گیر مانده‌اند. به گفته منابع، شماری از بسته‌گان مسافران گیر مانده به طالبان مراجعه کرده و خواستار نجات مسافران از ساحه بند باین شدند، اما ریاست فواید عامه این گروه برای آنان گفته است که «لدر» و «تراکتور‌های» تیل نداشته و قادر به بازگشایی راه‌های مواصلاتی و نجات مسافران نیستند.
