د طالبانو تر کنټرول لاندې د افغانستان مرکزي بانک خبر ورکړی چې دغه بانک په بلخ کې ۹۷۲ میلیونه او ۷۹۹ زره له کاره لوېدلې افغانۍ بانک نوټونه سوځولي دي.
مرکزي بانک د یکشنبې ورځ، د لیندۍ په ۵ مه، پر اېکس ټولنیزه پاڼه لیکلي چې دا بانک نوټونه د هېواد په شمالي زون کې د راکړې ورکړې د اسانتیا په موخه سوځول شوي دي.
په دغو پیسو کې یو، دوه، پنځه، ۱۰، ۲۰، ۵۰، ۱۰۰، ۵۰۰ او ۱۰۰۰ افغانۍ بانکنوټونه شامل دي.
د روان کال د لړم/عقرب په درېیمه د طالبانو تر کنټرول لاندې مرکزي بانک خبر ورکړی و چې دغه بانک په کندهار کې ۴۲۰ میلیونه او ۸۳۱ زره له کاره لوېدلې افغانۍ بانک نوټونه سوځولي دي.
دا په داسې حال کې ده چې د زړو او له کاره لوېدلو پیسو زیاتوالی د هېواد په بازارونو کې د ورځني سوداګرۍ پر وړاندې له جدي ستونزو څخه بلل شوی دی.
خو په ورته وخت کې د افغانستان په ناوړه اقتصادي وضعیت کې د چاپ لګښت دروند دی.
