د ازبکستان ولسمشر شوکت میرضیایف وايي، افغانستان د منځنۍ اسیا د نه بېلېدونکې برخې په توګه د سیمې په ثبات کې مهم رول لري.
میرضیایف دغه څرګندونې د جمعې ورځ، د اکټوبر په ۳مه په باکو کې د منځنۍ اسیا هېوادونو د اقتصاد لپاره د ملګرو ملتونو د ځانګړي پروګرام (سپیکا) په غونډه کې کړي.
په دې لیدنه کې میرضیایف د ملګرو ملتونو د اقتصادي کمېسیون څخه غوښتي چې له افغانستان سره په اقتصادي برخه کې همکاري وکړي.
د ازبکستان د ولسمشر دفتر په یوه خبرپاڼه کې د میرضیایف له خولې لیکلي:«موږ نه شو کولای افغانستان په خپلو ستونزو کې یوازې پریږدو. په نړۍوالو خبرو اترو کې د [طالبانو] له ګډون پرته مثبته پایله نه شي ترلاسه کېدای.»
د يادونې وړ ده چې د طالبانو له واکمنۍ وروسته د بېوزلۍ، بېکارۍ، د نشه يي توکو قاچاق او د بشري حقونو د سرغړونو شمېرې په بې ساري ډول زياتې شوې دي.
په دې وروستیو کې د ګډو ګټو خپلواکو هېوادونو د جمعې ورځ، د لیندۍ په درېیمه په یوه اعلامیه کې له افغانستانه د مخدره توکو قاچاق د سیمې لپاره یو ګواښ بللی دی.
دوی ټینګار کړی چې له افغانستانه سیمې ته د مخدره توکو قاچاق دوام لري.
