نیمروز سیمهییزې سرچینې د طالبانو تر کنټرول لاندې د دغه ولایت د استیناف څارنوالۍ په ودانۍ کې د اورلګېدنې خبر ورکوي.
دا اورلګېدنه د سېشنبې ورځ، د لړم میاشتې په ۱۶مه پیل شوې او تر یو ساعت زیات یې دوام کړی.
سرچینې له مطبوعات سره په خبرو کې تاییدوي چې د اورلګېدنې په پایله کې د دغه دفتر د ودانۍ یو پوړ/منزل په بشپړه توګه سوځېدلی دی.
که څه هم د نيمروز د استيناف څارنوالۍ په ودانۍ کې د اورلګېدنې اصلي لامل تر اوسه نه دی معلوم؛ خو طالبان ادعا کوي چې دغه اور د برېښنا د شارټۍ له امله لګېدلی دی.
د طالبانو تر مدیریت لاندې په دفترونو کې د اور لګېدنې پېښې کومه نوې خبره نه ده.
د خپاره شويو راپورونو پر بنسټ، په تېرو دوو مياشتو کې په غور کې د طالبانو دوه پوځي اډې په شکمن ډول سوځول شوې دي.
