د طالبانو د دفاع وزارت سرپرست محمدیعقوب مجاهد په کابل کې د اذربایجان له سفیر سره په کتنه کې له دغه هېواد سره د اقتصادي او سوداګریزو اړیکو پر پېلېدو ټينګار کړی دی.
د طالبانو دفاع وزارت چهارشنبه د غويي پر ۱۲مه د مجاهد او په کابل کې د اذربایجان سفیر الهام نریمان محمدوف ترمنځ له لیدنې خبر ورکړی دی.
مجاهد په دې کتنه کې زیاته کړې: «په کابل کې د اذربایجان سفارت پرانېستل یو مثبت ګام دی او موږ د اوږدمهاله اړیکو د پیاوړتیا لپاره په اقتصادي، سوداګریزو او نورو برخو کې د همکارۍ ژر پېلېدو غوښتونکي یو.»
دغه وزارت د محمدوف له قوله لیکلي چې نوموړي له طالبانو سره همکارۍ ته چمتوالی ښودلی.
د یادونې ده چې د دلوې میاشتې په وروستیو کې نریمان محمدوف په کابل کې د دغه هېواد د سفارت پرانېستلو رسمي مکتوب د طالبانو بهرنیو چارو وزارت سرپرست امیرخان متقي ته وسپاره.
څه موده وړاندې د طالبانو د رییسالوزرا سیاسي مرستیال مولوي عبدالکبیر په کابل کې د اذربایجان له سفیر سره په کتنه کې ویلي چې غواړي خپل سوداګریز توکي د اذربایجان له لارې اروپايي بازارونو پورې ورسوي.
