د ملګرو ملتونو سرمنشي انتونیو ګوترېش وايي چې په افغانستان کې ښځې او نجونې باید په معنی لرونکې ډول، د ژوند په ټولو برخو کې ګډون ولري.
ګوترېش سېشنبه، د کب پر لومړۍ نېټه خپلې اېکس پاڼې کې په افغانستان کې د طالبانو له لوري د ښځو او نجونو پر زدهکړو او کار بندیز «ظالمانه» بللی او د دغو بندیزونو د لیرې کېدو غوښتنه یې کړې ده.
سربېره پر دې، د ملګرو ملتونو سرمنشي د بشري حقونو د وضعیت په هکله په یوه جلا پیغام کې ویلي چې ډېری افغانان بې وزله دي، د خپل خوراک د خوندي کولو لپاره مبارزه کوي او له زدهکړو، روغتیايي خدمتونو او کار پرته ژوند کوي.
د ګوترېش په وینا، روان کال به د هېواد له نیمایي زیات نفوس مرستو ته اړتیا ولري؛ خو د ملګرو ملتونو د بشري غبرګون طرحې د اړتیا وړ بودیجې له درې سلنې څخه کمه ترلاسه کړې ده.
هغه همداراز د ملګرو ملتونو په ناسته کې چې د افغانستان په هکله د هېوادونو د ځانګړيو استازو په حضور دوحه کې جوړه شوې وه، د ښځو د وضعیت د خرابوالي، د ټولګډونه حکومت د نه رامنځته کېدو او په افغانستان کې د ترهګرۍ د له منځه وړلو د نشتوالي یادونه کړې ده.
بلخوا د ښځو پر وړاندې د تبعیض د له منځه وړلو په هکله د ملګرو ملتونو کمیټې په دې وروستیو کې په یوه بیان کې ویلي چې د طالبانو تبعیض سیاستونه کیدای شي په جنسي ځورونې بدل شي چې د روم د نړۍوالې جنایي محکمې په اساسنامه کې د بشریت ضد جرم په توګه پیژندل کېږي.
اړوندې لیکنې :
- له زدهکړې د نجونو د محرومیت ۱۰۰۰ ورځې؛ «د افغان نجونو د ملاتړ لپاره یو موټی شئ»
- د نوي ښوونیز کال پېل؛ یوناما: طالبان دې د نجونو پر وړاندې بندیز ختم کړي
- په خوست کې طالبانو له رسنیو سره د ښځو او نجونو پر ټیلفوني اړېکې بندیز ولګاوه
- د نجونو پر زده کړو بندیز؛ لغمان مېشتي طالبانو ته: د پردیو پر اشاره د ښځینهوو زدهکړو له…
- د امنیت شورا ناستې پای؛ ۱۱ هېوادونو غوښتي چې د افغان ښځو او نجونو ځپل پای ته ورسېږي
- د کړکېچونو او بشري څېړنو مرکز: د افغان نجونو د زدهکړو په اړه نړیوال کنفرانس جوړيږي