ګلوب اېند مېل ورځپاڼې راپور ورکړی چې افغانستان یو ځل بیا د «ترهګرو په ځاله» بدل شوی او په خبره یې، د طالبانو واکمنۍ د داعش په څېر ډلو ته اجازه ورکړې چې خپل جنګیالي راټول کړي.
دغې کاناډايي ورځپاڼې سهشنبه د وري پر ۷مه په یو راپور کې لیکلي چې د طالبانو دوه کلنه واکمنۍ د دې لامل شوې چې په خبره یې، داعش ان د دغې ډلې له صفوفو هم نوي غړي جذب کړي.
په راپور کې راغلي چې له یو شمېر «ترهګرو ډلو» لکه القاعده او ټيټيپي سره د طالبانو ایډیالوژیکه خواخوږي په دې مانا ده چې په وینا یې، دا ډله ونه غواړي د سیمې هېوادونو ته د ورپېښو ګواښونو پر وړاندې اقدام وکړي.
د راپور په حواله، طالبانو له یوه لوري ښځې له خپلو بنسټيزو او لومړنیو حقونو بېبرخې کړې دي او بل پلوه یې د داعش بیاراژوندي کېدو لپاره زمینه برابره کړې ده.
دغې کاناډايي ورځپاڼې لیکلي: «امنیتي راپورونو او کارپوهانو اټکل کړی چې ښايي شپږ زره بهرني جنګیالي د طالبانو تر واکمنۍ لاندې افغانستان ته تللي وي.»
پر افغانستان د طالبانو له واکمنېدو وروسته، د داعش خراسان څانګې په سیمه او افغانستان کې خپلو بریدونو ته زور ورکړی دی.
څو ورځې وړاندې د داعش یو ځانمرګي په کندهار کې د کابل بانک مخته ځان پورې نښلول شویو چاودېدونکو توکو ته چاودنه ورکړه چې په پاېله کې یې ۴۵ کسان ووژل شول او ۵۶ نور بیا ټپيان شول.
پرون د امریکا د بهرنیو چارو وزارت ویاند متیو مېلر هم ویلي چې افغانستان دې د «ترهګرو پر خوندي ځالې» نه بدلېږي او په خبره یې، هغوی په دغه هېواد او سیمه کې د داعش له ګواښونو اندېښمن دي.
