د امریکا د استخباراتو د مرکزي ادارې «سي ای اې» مرستیال ډېوېډ کوهن وایي چې د روسیې ولسمشر ولادیمیر پوتین د اوکراین لخوا د کورسک د نیول شوې سیمې د بېرته نیولو لپاره چمتووالی نیسي.
کوهن چهارشنبه، د اګسټ پر ۲۸مه، په یوه امنیتي غونډه کې ویلي دي چې د روسیې ځواکونه به د دې سیمې د بېرته نیولو لپاره له «سختې مبارزې» سره مخ شي.
هغه زیاته کړې: «پوتین باید نه یوازې له دې واقعیت سره مخ شي چې اوس په روسیه کې د جګړې لومړۍ کرښه جوړه شوې او باید له هغې سره مقابله وکړي، بلکې په خپله ټولنه کې باید له دې مسألې سره هم مخ شي چې د روسیې یوه برخه یې له لاسه ورکړې ده.»
د رویټرز د راپور له مخې، د سي ای اې مرستیال ویلي چې کېیف له خپلې خاورې سره د نیول شویو سیمو د یو ځای کولو هڅه نه کوي، خو د اوکراین ځواکونه په کورسک کې د دفاعي کرښو جوړولو په حال کې دي.
د دغه امریکایي استخباراتي چارواکي په باور، پر کورسک د اوکراین نفوذ د جګړې وضعیت بدل کړی دی.
کېیف اعلان کړی چې د اوکراین ځواکونو د کورسک په سیمه کې د استوګنې شاوخوا ۱۰۰ سیمې نیولي دي.
له بلې خوا، د روسیې ځواکونو هم د اوکراین د ختیځ په دونتسک سیمه کې پرمختګ کوي.
دا په داسې حال کې ده، چې تر دې وړاندې مسکو اعلان کړی و چې د کورسک پرسیمه د اوکراین له برید وروسته، نور د جګړې د پای ته رسولو لپاره د خبرو اترو لاره نشته.
