په پنجشېر کې ځايي سرچینې وايي چې په دغه ولایت کې د ګازنیونې له امله د یوې کورنۍ درېیو کسانو ژوند بایللی دی.
دا پېښه چهارشنبه د کب پر ۱۷مه د یاد ولایت په عنابه ولسوالۍ کې شوې ده.
سرچینو رسنی ته ویلي چې په دې پېښه کې د حکمتالله رسولي په نوم یو سړی، مېرمن او ماشوم یې مړه شوي دي.
د سرچینو په خبره، حکمتالله رسولي په پنجشېر کې علمي کادر و.
طالبانو هم د دې پېښې پخلی کړی دی.
په ژمي کې د هېواد یو شمېر اوسېدونکي د خپلو خونو د ګرمولو لپاره ګاز کاروي چې له کبله یې وخت ناوخت داسې پېښې رامنځته کېږي.
تر دې وړاندې هم په ځينو ولایتونو کې د ورته پېښو له امله لسګونه هېوادوالو ژوند بایللی و.
