په غزني کې سیمهییزې سرچینې وايي چې د دغه ولایت په اندړو ولسوالۍ کې یو کس د دوو کورنیو ترمنځ د شخړې په پاېله کې وژل شوی دی.
سرچینې وايي چې پنجشنبه د سلواغې پر ۱۹مه ماسپښین مهال د محمدایوب په نوم یو ځوان د اندړو ولسوالۍ په شاتور سیمه کې په ډزو وژل شوی دی.
د سرچینو په خبره، دا پېښه د ځمکې پر سر تر لفظي شخړې وروسته رامنځته شوې ده.
ورته مهال په غزني کې د طالبانو امنیې قوماندانۍ هم د یوې خبرپاڼې په خپرولو ویلي چې تورن کس یې نیولی او تر پوښتنو لاندې دی.
د یادونې وړ ده چې له دې وړاندې هم د هېواد په ځينو ولایتونو کې د ورته پېښو له کبله خلکو ته مرګ ژوبله اوښتې ده.
د رسنی د موندنو له مخې، تېره یوه میاشت په لغمان، سمنګان او پروان کې د ورته پېښو له کبله لږ تر لږه شپږ کسان وژل شوي دي.
