په سرپل کې ځايي طالب چارواکي په دغه ولایت کې د یخې هوا او یوې خونې د چت لوېدو په پېښه کې د پنځو کسانو د مړینې خبر ورکړی دی.
په سرپل کې د طالبانو د والي ویاند حبیبالله مسرور دوشنبه د کب پر ۱۴مه ویلي چې په مړو شویو کې دوه ماشومان، دوه ښځې او یو نارینه دی.
نوموړي زیاته کړې چې د دغه ولایت په البدر ولسوالۍ کې دوو ښځو او دوو ماشومانو د سړې هوا او روغتیايي مرکز ته په وخت د نه رسېدو له کبله ساه ورکړې او پر یو نارینه بیا د کوهستانات ولسوالۍ په دهسرخ کلي کې د کوټې چت لوېدلی دی.
ورته مهال، نوموړي ویلي چې په سانچارک ولسوالۍ کې هم د دوو کورونو چتونه لوېدلي دي.
دوه ورځې وړاندې پېښو ته د چمتووالي وزارت ویاند ویلي چې په تېرو ۱۲ ورځو کې په هېواد کې د سختې واورې او یخنۍ له امله لږ تر لږه ۲۰ کسان مړه شوي او ۱۴ نور ټپیان شوي دي.
په وروستیو ورځو کې د هېواد په بېلابېلو ولایتونو کې درنه واوره او باران ورېدلی دی.
