په روزګان کې ځايي سرچینې وايي چې په دغه ولایت کې یو کس له څاه څخه د یو ماشوم د ژغورلو پر مهال ساه ورکړې ده.
سرچینو شنبه د سلواغې پر ۲۸مه ویلي چې دا پېښه پرون ناوخته د دغه ولایت د خاص روزګان ولسوالۍ په مرکز کې شوې ده.
د سرچینو په خبره، دغه کس ۶۸ کاله عمر لاره او کله یې چې غوښتل په څاه کې ایسار ماشوم وژغوري، خپله مړ شوی دی.
ورته مهال، د ماشوم روغتیايي حالت بیا د ډاډ وړ ښودل شوی دی.
طالبانو هم دا پېښه تایید کړې ده.
دا ډول پېښې له دې وړاندې هم په ځينو ولایتونو کې شوې دي.
