د ننګرهار سیمهییزې سرچينې وايي چې د پاکستان له خوا د تورخم دروازه په بشپړه توګه تړل شوې ده.
د سرچينو په وینا، دا دروازه، شنبه د زمري پر ۲۷مه سهار مهال د مسافرو او موټرو د تګراتګ پر مخ تړل شوې ده.
سرچینې زیاتوي چې پاکستان د ډیورنډ فرضي کرښې هغې غاړې ته د افغان کډوالو د نیولو او په دې سیمه کې د سېلابونو د راوتلو له کبله د تورخم دروازه تړلې ده.
د سرچينو د معلوماتو پر بنسټ، دا مهال د دې لارې دواړو غاړو ته لسګونه باروړونکي او سلګونه مسافر بند پاتې دي.
پاکستاني او طالب مسوولانو تر اوسه په دې تړاو څه نه دي ویلي.
د یادونې ده چې پاکستان د تېرې اوونۍ دوشنبه هم د تورخم دروازه د دغه هېواد د پولهساتو او طالبانو ترمنځ له نښتې وروسته تړلې وه.
