د پاکستاني طالبانو غورځنګ «ټيټيپي» په خیبرپښتونخوا کې د بهرنیو دیپلوماتانو د موټرو پر کاروان شوي برید کې لاس لرل رد کړي دي.
نوموړي غورځنګ دوشنبه د سپټمبر پر ۲۳مه یو خپاره کړي بیان کې ویلي چې پر دغه کاروان شوي برید کې لاس نه لري.
په بیان کې راغلي: «پر بهرنیو دیپلوماتانو شوی برید له موږ سره تړاو نه لري.»
د موټرو دا کاروان پرون په خیبرپښتونخوا کې د ځای پر ځای شوي ماین ښکار شو چې په پاېله کې یې یو پولیس ووژل شو.
ماین هغه مهال چاودنه کړې چې د موټرو کاروان د خیبرپښتونخوا په سوات سیمه کې د تېرېدو په حال کې و.
ویل کېږي چې په دغه کاروان کې د روسیې، تاجکستان، ایران، ازبکستان، قزاقستان، ترکمنستان، اندونیزیا، ویتنام او څو نورو هېوادونو دیپلوماتان وو.
د خیبرپښتونخوا چارواکو ویلي چې په دغه برید کې بهرنیو دیپلوماتانو ته زیان رسېدلی نه دی.
د یادونې ده چې څو میاشتې وړاندې هم په دغه هېواد کې ناڅرګندو وسلهوالو پنځه چینايي انجنیران وژلي وو.
