والیانو د بدخشان په غونډه کې د «شر جوړونکو» د مخنیوي ټینګار وکړ

په بدخشان کې د شمال لویديځ او شمال ختیځ ۹ ولایتونو د طالبانو والیانو، استخباراتو مشرانو او امنیه قومندانانو په یوه غونډه کې ټینګار وکړ، چې د شر جوړونکو فعالیتونه به وځنډوي.
دغه ناسته د هبت الله اخوندزاده په امر د همغږۍ د زیاتولو لپاره ترتیب شوې وه.
د طالبانو د بدخشان والي محمدایوب خالد ویلي، چې دغه ناسته د خپلو همکارانو ترمنځ همغږي زیاتولو او د اړیکو پیاوړتیا په موخه ترسره شوې ده.
واليانو د هبت الله اخوندزاده ۳۱ ګڼه فرمان د نشه یي توکو په له منځه وړلو کې د تطبیق ټینګار وکړ.
په دې غونډه کې طالبانو د «شر او فساد جوړونکو» د مخنیوي ژمنه وکړه، خو دا مشخصه نه کړه چې دقیقاً څوک هدف دي.
په شمالي ولایتونو کې د طالبانو پر ضد وسله وال مخالفتونه او جګړې په زیاتېدو دي.