پاکستانۍ ورځپاڼې، اېکسپرېس ټرېبیون، ادعا کړې چې هند د طالبانو له لارې د پاکستان د بېثباته کولو لپاره ټيټيپي او بلوڅ بېلتون غوښتونکو ته وسلې ورکوي.
ورځپاڼې په یوې مقاله کې د افغانستان د پخواني جمهوري نظام یوه لوړپوړي چارواکي له قوله ویلي چې هند په افغانستان کې د پاکستان ضد ډلو سره مالي مرستې کوي، وسلې ورکوي او حتی پټنځایونه هم ورته برابروي.
د مقالې په وینا، طالبان د دغو ډلو پر وړاندې چوپه خوله پاتې دي، او د سیمې امنیتي کارپوهان د پاکستان د بېثباتۍ درې عمده عوامل په افغانستان کې د حاکمیت خلا، پرمختللې وسلې او د ټيټيپي او بلوڅ بېلتون غوښتونکو همکاري ګڼي.
همچنان، د ملګرو ملتونو راپورونه ښيي چې طالبان د دې ترهګرو ډلو د فعالیتونو پر وړاندې هېڅ اقدام نه کوي.
د امریکا یو څېړنیز مرکز هم ویلي چې د هند استخبارات د ترهګرو ډلو د مخابراتو شبکه کنټرولوي، او د افغانستان د ځینو هوايي ډګرونو څخه د وسلو لېږد روان دی.
