اطلاعات روز: ننګرهار کې ځایي سرچینې خبر ورکوي، چې د دغه ولایت په کامې ولسوالۍ کې یو ځوان د اقتصادي ستونزو له کبله ځان د ټوپک په ډزو وژلی دی.
د سیمې یو اوسیدونکی زمرک وايي، چې دا ځوان محمد خان نومېده او نن، شنبه، ۲۶ د لړم، سهار وختي ۰۵:۰۰ بجې یې ځان د کامې ولسوالۍ شیرګړ قریې اړوند «تيلیانو» کلي کې د خپلې خوب په خونه کې د «کربین» ټوپک په وسیله وژلی دی.
د نوموړي د معلوماتو له مخې د دغه ځوان د ځان وژنې لامل بې روزګاري او اقتصادي ستونزې وې چې له کبله یې هغه ځان وژنې ته اړ شوی دی.
په سیمه کې یوې بلې سرچېنې هم د یادې پېښې پخلی کړی او زیاته کړې یې ده، چې یاد ځوان درې کلونه کیدل کوژده وه او د ولور پېسو د نشتون او بې روزګارۍ له کبله په رواني ناروغۍ اخته شوی و، چې ځان یې د خوب په خونه کې په ډزو وژلی دی.
مونږ هڅه وکړه په دې اړه د ځایي چارواکو نظر هم ولرو خو بریالي نشوو.
په دې وروستیو کې د هیواد په بېلابېلو سیمو کې د ځوانانو دا ډول د ځان وژنې پېښې زیاتې شوي چې لامل یې تر ډیره اقتصادي ستونزې، بې روزګاري او رواني ناروغۍ بلل کېږي.
