په افغانستان کې د ملګرو ملتونو د بشري مرستو د همغږۍ دفتر «اوچا» له افغانستان سره د ناروې د ۲۰ میلیونه کرونر «۱.۸ میلیونه ډالرو» مرستې خبر ورکړی دی.
اوچا یکشنبه د وږي پر ۱۸مه په اېکس ټولنیزه پاڼه کې لیکلي چې ناروې دا مرسته د افغانستان د بشري مرستو له صندوق سره کړې ده.
اوچا د ناروې له نوې مرستې څخه د مننې په څرګندولو سره ویلي دغه هېواد په تېرو ۱۰ کلونو کې د افغانستان د بشري مرستو له صندوق سره ١٨٩ ميليونه کرونر مرسته کړې ده.
اوچا تر دې مخکې ویلي و چې د طالبانو تر واک لاندې افغانستان له جدي بشري ناورین سره مخ دی.
دغې ادارې تېره میاشت اعلان کړی و چې په ۲۰۲۴ کال کې افغانستان ته د اړتیا وړ ۳.۰۶ میلیارده ډالرو بودیجې یوازې ۲۵ سلنه برابرې شوې دي.
اوچا هغه مهال له هېوادونو او مرستندويه بنسټونو غوښتي و چې په افغانستان کې د بشري ناورين د پاى ته رسېدو لپاره لا زياتې مرستې وکړي.
دغه نړیوال بنسټ شاوخوا دوه میاشتې وړاندې راپور ورکړی و چې په افغانستان کې ۲۳.۷ میلیونه خلک بشري مرستو ته اړتیا لري.
