د طالبانو د کډوالو او بېرته راستنېدونکو چارو وزیر مولوي عبدالکبیر خوست ته د خپل سفر په ترڅ کې د دغه ولایت پر اوسېدونکو غږ کړی چې له طالبانو ملاتړ وکړي.
سرچینو دوشنبه د سلواغې پر ۸مه، ویلي چې دا طالب چارواکی له څو ورځو راهیسې په خوست کې دی.
نوموړي ادعا کړې چې د طالبانو ترمنځ اختلاف نه شته او ټول یو لاس دي.
مولوي عبدالکبیر له دې وړاندې د طالبانو د ریاست الوزرا سیاسي مرستیال و.
دغه طالب چارواکي په بهر مېشتو افغانانو هم غږ کړی چې هېواد ته راشي.
د یادونې ده چې مولوي عبدالکبیر د طالبانو د کډوالو او بېرته راستنېدونکو چارو وزیر په توګه له ګومارل کېدو وروسته خپل ولایتي سفرونه پيل کړي دي.
