د ملګرو ملتونو د خوړو نړۍوال پروګرام وايي چې په بدخشان ولايت کې د وروستیو سېلابونو د راوتلو په پایله کې لس کسان مړه شوي دي.
نوموړي سازمان یکشنبه د غبرګولي پر ۶مه ویلي چې په وروستيو اوونيو کې په افغانستان کې ٨٠ زره کسان د سېلابونو له کبله اغېزمن شوي دي.
د خوړو نړۍوال پروګرام په خبره، په افغانستان کې زیات سېلابونه رامنځته شوي او د راپورونو پر بنسټ په بدخشان کې د انساني مرګژوبلې سربېره استوګنیزې ودانۍ او سړکونه هم ویجاړ شوي دي.
ورته مهال، سیمهییزې سرچينې وايي چې د سمنګان ولايت د روى دواب ولسوالۍ په مرکز کې د تېرې شپې سېلابونو په پایله کې لږترلږه ٢١ کورونه نړیدلي او سلګونه جريبه کرنيزه ځمکه له منځه تللې ده.
تر دې دمخه په بدخشان کې د طالبانو سیمهییزو مسوولانو ویلي و چې د دغه ولايت د مرکز فيضاباد ښار د ۹مې ناحيې اړوند په «مورچک» کلي کې شنبه د غبرګولي پر ۵مه شپه مهال د سېلابونو راوتلو له په ترڅ کې د يوې کورنۍ ۱۰ غړي مړه شوي دي.
