د افغانستان د مقاومت جبهې د کونړ د ناورین له قربانیانو سره خپله خواخوږي څرګنده کړې او له خلکو یې غوښتي، چې د زلزله ځپلو کورنیو سره د مرستې لاس ورکړي.
دغه جبهه وايي، د هېواد ختیځو ولایتونو کې زرګونه کورنۍ د مرګژوبلې او کورونو د ورانېدو له امله له سختو ستونزو سره مخ دي.
په یوه خپره شوې اعلامیه کې، مقاومت جبهې له کورنیو او بهرنیو بشرپالو بنسټونو، خیریه سازمانونو او ملي سوداګرو غوښتي چې د مشروع حکومت د نشتوالي په شرایطو کې، د عاجلو مرستو په برابرولو کې بېړني ګامونه پورته کړي.
د دغې جبهې په وینا، د زلزله ځپلو لاسنیوی یوازې یو انساني اړتیا نه ده، بلکې یو اسلامي، ملي او اخلاقي مسوولیت دی.
