د پاکستان د ملي ډیموکراټیک غورځنګ مشر او د دغه هېواد د پارلمان پخوانی غړی محسن داوړ وايي، هر هغه څوک چې د پښتنو د حقونو غوښتنه کوي، باید د طالبانو پر ضد مبارزه کې لومړی ګام پورته کړي.
ښاغلي داور دا خبره د تېرې جمعې په ورځ د وږي ۹مه، پر خپل فېسبوک پاڼه لیکلي.
داوړ د پاکستان پښتنو ملتپالو ته، چې د طالبانو په وړاندې نرم دريځ غوره کوي، وويل، چې د طالبانو پر وړاندې له جګړې پرته د پښتنو حقونه نه شي تر لاسه کېدای. هغه زیاته کړه چې دوی باید د «افغانستان له تجربو» زده کړه وکړي.
د پاکستان د پارلمان دغه پخواني غړي ویلي، که څوک د طالبانو د دریځ د مشروعیت لپاره توجیه او بهانې لټوي، د پاکستان د پوځ پر ضد د دوی څرګندونې او بیانيې بې اساسه او دروغ دي.
نوموړي څرګنده کړه، چې دا ډول تګلارې نه يوازې د پښتنو د حقونو لپاره مبارزه نه ده، بلکې د مبارزې تر نامه لاندې د هغوى د حقونو د تر پښو لاندي کولو په معنا ده.
