د طالبانو ویاند ذبیحالله مجاهد د ملګرو ملتونو ځينو غړو په ځانګړې توګه د افغانستان د بشري حقونو لپاره د دغه سازمان د ځانګړي راپور ورکوونکي ریچارډ بېنټ راپور د دوحې راتلونکې ناستې په درشل کې د عامه اذهانو د خرابولو هڅه بللې.
مجاهد چهارشنبه د غبرګولي پر ۳۰مه په خواله شبکې اېکس کې لیکلي چې په ملګرو ملتونو کې ځينې کسان هڅه کوي؛ څو په خبره یې، د افغانستان په اړه ناسم تصویر وړاندې کړي او لوی پرمختګونه د څو محدودو موضوعاتو تر شعاع لاندې راولي.
نوموړي د ریچارډ بېنټ راپور ته په اشارې هغه یوه ناکامه هڅه بللې.
مجاهد زیاته کړې چې طالبان په ملګرو ملتونو کې د ځينو هېوادونو حمایوي دریځ ستايي او زیاتوي: «حقیقت دا دی چې له [طالبانو] سره باید مثبت او رغنده تعامل وشي.»
ریچارډ بېنټ پرون د ملګرو ملتونو د بشري حقونو شورا ۵۶مه غونډه کې د افغانستان په اړه خپل راپور وړاندې کړ او ویلي دي چې لا هم د طالبانو تر واکمنۍ لاندې د ښځو پر وړاندې تاوتریخوالی پراخ دی.
نوموړي په افغانستان کې د «جنسیتي اپارتاید» د رسمیت پېژندلو غوښتنه کړې او ټینګار یې کړی چې طالبانو ته د مشروعیت ورکولو او اړیکو له عادي کولو دې ډډه وشي.
طالبانو د دوحې په راتلونکې ناسته کې د ګډون تیاری ښودلی دی.
ټاکل شوې چې د افغانستان په اړه د دوحې درېیمه غونډه د چنګاښ پر ۱۰ او ۱۱مه د قطر په پلازمېنه دوحه کې جوړه شي.
