د طالبانو د بهرنیو چارو وزارت سرپرست امیرخان متقي ویلي چې له هېڅ لوري سره د ټکر او شخړې غوښتونکي نه دي.
متقي دا څرګندونې نن دوشنبه د سلواغې پر ۹مه په کابل کې«د افغانستان د سیمهییزې همکارۍ ابتکار» ناستې ته کړې دي.
نوموړي زیاته کړې چې طالبانو په وار وار پر مثبت تعامل ټينګار کړی دی.
هغه زیاته کړې: «د دې پر ځای چې د حکومتولۍ نسخې وړاندې شي او د نظام بڼې ته ګوته ونیول شي، ښه به وي چې د ګډو ګټو پر بنسټ تعامل وشي.»
د متقي په خبره، افغانستان د یوناما په شتون کې د ملګرو ملتونو بل ځانګړي استازي ته اړتیا نه لري.
متقي زیاته کړې چې طالبان تیار دي د اندېښنو او ګډو مسایلو په اړه له سیمهییزو او نړیوالو خواوو سره خبرې اترې وکړي.
دا په داسې حال کې چې د نړۍ هېوادونو په وار وار په افغانستان کې د ټولګډونه حکومت پر جوړېدو ټينګار کړی دی.
د یادونې وړ ده چې طالبان «د افغانستان د سیمهییزې همکارۍ ابتکار» ناسته کې د څو هېوادونو د ځانګړو استازو او سفیرانو کوربتوب کوي.
د دې ناستې موخه، د افغانستان او سیمې هېوادونو ترمنځ د سیمهییز روایت د جوړېدو او د سیمهییزو همکاریو د پراختیا په اړه بحث ښودل شوی دی.
