د طالبانو تر کنټرول لاندې طبیعي پېښو ته د رسېدو په چارو کې د دولت وزارت ویلي چې د روان کال د غبرګولي له څلورمې تر شپږمې د هېواد په بېلابېلو ولایتونو کې د راوتلو سېلابونو لامله ۲۱ کسان مړه او ۱۹ نور ټپيان دي.
د نوموړي وزارت ویاند جانان سایق په یوه ویډیويي پيغام کې ویلي چې دا سېلابونه په بغلان، بامیان، سمنګان، تخار، فاریاب او ننګرهار کې راوتلي و.
د یاد وزارت ویاند زیاته کړې، له مرستندویه بنسټونو سره په ګډه هڅه کوي چې سېلاب ځپلو ته د څښلو پاکې اوبې برابرې کړي.
په وروستیو ورځو کې د هېواد په بېلابېلو ولایتونو کې د ورښتونو لامله راوتلو سېلابونو ګڼ ځاني او مالي زیانونه اړولي دي.
له دې وړاندې د ملګرو ملتونو د ماشومانو وجهي صندوق (یونیسف) ویلي چې په هېواد کې د وروستیو سېلابونو لامله د اوبو رسونې ځينې شبکې زیانمنې شوې دي.
په بېلابېلو ولایتونو کې سېلاب ځپلي وايي چې دمګړۍ خوړو، اوبو او سرپناه ته بېړنۍ اړتیا لري.
