د طالبانو د صنعت او سوداګرۍ وزارت «په هرات کې د قزاقستان د سوداګرۍ کور» له پرانېستلو خبر ورکړی دی.
نوموړي وزارت سهشنبه د غويي پر ۱۸مه په یوې خپرې کړې خبرپاڼه کې ویلي چې د طالبانو د صنعت او سوداګرۍ وزارت سرپرست نورالدین عزیزي «په افغانستان کې د قزاقستان د سوداګرۍ کور» پرانېستنه د دواړو لوریو ترمنځ د سوداګرۍ په پراختیا او پیاوړتیا کې مثبت او اغېزناک ګام بللی دی.
نوموړي ادعا کړې چې قزاقستان ته د افغانستان صادرات ډېر شوي دي.
ورته مهال، «په افغانستان کې د قزاقستان د سوداګرۍ کور» رییس ارمان یوسینتایف ویلي چې د سوداګرۍ دا کور د دواړو هېوادونو ترمنځ د سوداګریزې راکړې ورکړې په کچه او ارزښت کې د زیاتوالي په موخه پرانېستل شوی دی.
نوموړي زیاته کړې چې استانه له طالبانو سره د سوداګریزو اړیکو پراختیا ته لېواله ده.
له دې وړاندې نورالدین عزیزي رویټرز خبري اژانس ته ویلي چې له قزاقستان او ترکمنستان سره یې په هرات کې د لوژیستکي مرکز پر جوړولو هوکړه کړې ده. نوموړي د دغه مرکز د جوړولو موخه سویلي اسیا ته د روسیې د تېلو په ګډون د سیمې صادرات بللي دي.
طالبان په تېرو نږدې درېیو کلونو کې له قزاقستان او ترکمنستان سره نږدې سوداګریزې اړیکې لري.
