د ایراني ولسمشر سېدابراهیم رییسي او بهرنیو چارو وزیر حسین امیر عبداللهیان د لېږدونکې الوتکې لوېدو راپورونو له خپرېدو وروسته، د طالبانو بهرنیو چارو وزارت ویلي چې وضعیت په «وېره او هیله» څاري.
د طالبانو بهرنیو چارو وزارت یکشنبه د غويي پر ۳۰مه په اېکسپاڼه کې لیکلي: «دوی د ایران ولسمشر ابراهیم رییسي، بهرنیو چارو وزیر حسین امیر عبداللهیان او د هغوی د نورو ملګرو د لېږدونکې چورلکې د برخلیک په اړه راپورونه په وېره او هیلهمنتیا څاري.»
نوموړي وزارت زیاته کړې: «[طالبان] په دغه سخت وضعیت کې د ګاونډي ایران له حکومت او ورور ملت سره ولاړ دی او هیله لري چې ناوړه پېښه نه وي شوې.»
په خبرپاڼه کې هیله ښودل شوې چې ژغورنکې ډلې به د ایران ولسمشر او د هغه د سفر ملګرو پر ژغورلو بریالي شي.
د یادونې ده چې په دې الوتکه کې د ختیځ اذربایجان والي ایتالله ال هاشم هم سپور و.
تسنیم خبري اژانس ویلي چې نامناسبې هوا او سختو لوخوړو د ایران د ولسمشر سیدابراهیم رییسي لېږدونکي چورلکي د لټون عملیات له ستونزو سره مخ کړي دي.
د راپور په حواله، د پېښې اصلي ځای د ایران د ختیځ اذربایجان ولایت د ورزقان او جلفا سیمو ترمنځ عمومي محدوده «دیزمار ځنګل» کې دی.
