د طالبانو د کورنیو چارو وزارت ویاند عبدالمتین قانع په بدخشان کې رامنځته شوي کړکېچ ته په غبرګون کې ویلي چې هڅه کوي دا ستونزه د خلکو په همکارۍ حل کړي.
قانع شنبه د غويي پر ۱۵مه په خپله اېکسپاڼه کې لیکلي چې دمګړۍ حالت عادي دی او سیمه د دغې ډلې د ځواکونو تر کنټرول لاندې ده.
نوموړي زیاته کړې: «د کوکنارو د کښت په تړاو د ملا هبتالله اخوندزاده[د طالبانو مشر] فرمان څرګند او روښانه دی او [طالبان] یې پلي کولو ته ژمن دي.»
دا په داسې حال کې ده چې سرچینو ورځپاڼې ته ویلي چې طالبانو د درایم ولسوالۍ اوسېدونکو د لاریون له پراخېدو او د بدخشان جرم او ارګو ولسوالیو ته د کړکېچ غځېدو له وېرې د دغه ولایت تر ګواښ لاندې سیمو کې تازه دمي ځواکونه ځای پر ځای کړې دي.
ورته مهال، د بدخشان په درایم ولسوالۍ کې سرچینې وايي چې احتجاج کوونکو له طالب مذاکره کوونکي پلاوي سره له خبرو ډډه کړې ده.
د یادونې ده چې د راپورونو په حواله، دغه لاریونونه د بدخشان د درایم ولسوالۍ د اوسېدونکو له خوا هغه مهال پېل شول چې طالبانو د کوکنارو د کښت د لهمنځه وړلو لپاره دغې ولسوالۍ ته تللي و چې له ځايي اوسېدونکو سره تر ښکېلېدو وروسته یو ولسي وګړی ووژل شو.
اړوندې لیکنې :
- په غزه کې د امریکا په همکارۍ د اسرائیلو د جنایتونو افشا کول: نامعلومو امریکايي افسرانو د…
- طالبان او د افغانستان د خلکو استثمار
- «د افغانستان د سیمهییزې همکارۍ ابتکار» ناسته پېل شوه
- مالیزیايي چارواکی حقاني ته: د سایبري امنیت په برخه کې له طالبانو سره همکارۍ ته چمتو یو
- د طالبانو د اوسپنې پټلۍ سرپرست د «دوه اړخیزه پټلۍ همکارۍ» په موخه ترکمنستان ته سفر وکړ
- د افغانستان له خلکو سره د لویدیځ دوه مخی لوبه