د بشري حقونو څار سازمان څېړونکې سحر فطرت ویلي، چې طالبانو د جولای له ۱۶مې نېټې راهیسې په کابل کې لسګونه نجونې یوازې د دې لپاره نیولې دي چې ګواکي له حجاب څخه سرغړونه یې کړې.
نوموړې په خپل څېړنیز راپور کې ادعا کړې چې دا نیونې د طالبانو لهخوا د «امر بالمعروف او نهې عن المنکر» د هغه قانون دوام دی، چې د تېر کال په اګسټ کې نافذ شوی و.
د راپور له مخې، طالبانو غواړي ښځې له خپل ټولنیز حضور څخه محرومې، د دوی غږ پټ او د بدن هره برخه یې تر پردې لاندې راولي.
سحر فطرت دغه چلندونه د جنسیتي توپیر څرګنده بېلګه بللې او له نړۍوالې ټولنې یې غوښتي چې د ښځو د حقونو د دفاع لپاره دا عمل د جرم په توګه وپېژني او لازم اقدامات وکړي.
