د طالبانو د بیا واکمنېدو وروسته، افغانستانی ښځې له پراخو محدودیتونو سره مخ شوې دي؛ چې نه یوازې یې د زدهکړې، کار، تګ راتګ او ټولنیز ګډون حقونه تر پښو لاندې شوي، بلکې د ژوند په ټولو برخو کې تر فشار لاندې راغلي دي.
د ایرو اېشیا ژورنال په یوه وروستي راپور کې راغلي چې طالبان په یوه منظم سیاست سره هڅه کوي د ښځو رول، لید او فعالیت له ټولنې څخه حذف کړي، او له شپږم ټولګي پورته د نجونو پر زدهکړو، د ښځو پر کار، او د هغوی پر تګ راتګ سخت بندیزونه لګول شوي دي.
راپور زیاتوي چې د دغو بندیزونو له امله زرګونه ښځې بېکاره شوي او اړ شوې چې غېر رسمي، کمعاید او له خطر ډک کارونه ترسره کړي.
هغه ښځې چې کوچني یا آنلاین کاروبارونه پیل کړي، اوس د انټرنېټ د محدودیتونو، لوړو بیو او اقتصادي ستونزو له امله له نورو خنډونو سره مخ دي.
سره له دې، راپور وايي چې افغانستانی ښځو خپل مقاومت، هوډ او هڅې نه دي پرېیښي، خو که نړیوال ملاتړ او بنسټیز اصلاحات رامنځته نه شي، دا مبارزه ښايي چوپ پاتې شي.
