د سپټمبر ۱۵مه د ولسواکۍ یا ډیموکراسۍ نړیواله ورځ ده، چې هر کال د رایې ورکولو، د بیان ازادۍ، عدالت او حساب ورکونې ارزښتونو د پیاوړتیا لپاره نمانځل کېږي.
خو په افغانستان کې د طالبانو له واک ته رسېدو وروسته د ولسواکۍ بنسټیزې هڅې له جدي ستونزو سره مخ شوې دي.
ټاکنې بندې شوې، پارلمان منحل شوی، رسنۍ له سانسور او فشار سره مخ دي او د خلکو سیاسي ګډون محدود شوی دی.
د ښځو او بشري حقونو فعالان وايي، د طالبانو د واکمنۍ پر مهال ولسواکي نه یوازې ودرېدلې، بلکې د خلکو د ښکېلتیا او حکومتولۍ لپاره د دوامداره هڅو پر وړاندې لوی خنډونه موجود دي.
هغوی ټینګار کوي چې د افغانستان راتلونکی یوازې هغه مهال باثباته کېدای شي چې د خلکو رایه، د بشري حقونو درناوی او د حساب ورکونې کلتور خوندي او پیاوړی شي، او افغانان باید هېڅکله له هڅو نه لاس وانخلي.
