د افغانستان د بیارغونې لپاره د امریکا ځانګړې څارونکې اداره (سیګار) په خپل تازه راپور کې ویلي، چې له افغانستان سره د امریکا د مرستو ډېری پروژې بندې شوې، خو اوس هم درې پروژې تمویلېږي.
دغه پروژې چې د افغانستانی نجونو لپاره انلاین زدهکړې او د نشهيي توکو سروې رانغاړي، له اتریش او ازبکستان څخه اداره کېږي.
راپور زیاتوي، چې طالبانو د هغو موسسو تخنیکي وسایل او موټرونه قبضه کړي چې د امریکا پروژې یې عملي کولې او د مرستو بندېدو له امله تړل شوې دي.
سیګار همداراز ویلي، چې له ایران او پاکستانه د افغانستانی کډوالو جبري ایستل او له هغوی سره د مرستو نشتوالی د یوه لوی بشري بحران لامل ګرځېدلی دی.
