په لوګر کې سیمهییزې سرچینې وايي چې طالبانو په دغه ولایت کې د یوې ښځې په ګډون اووه کسان په دُرو وهلي دي.
سرچینې وايي چې دا کسان پنجشنبه د وري پر ۱۶مه له غرمې وروسته د لوګر په محمداغې ولسوالۍ کې په عام محضر کې په دُرو وهل شوي دي.
سرچینې وايي چې دا اووه کسان په نامشروع اړیکو تورن و او هر یو له ۲۵ تر ۳۹ دُرو وهل شوي دي.
بلخوا، د طالبانو سترې محکمې په یوې خپرې کړې خبرپاڼه کې ویلي چې د کابل ده سبز ولسوالۍ ابتداییه محکمې یوه ښځه او یو نارینه چې په نامشروع اړیکو تورن و، په دُرو وهلي دي.
ورته مهال، د طالبانو سترې محکمې زیاته کړې چې په کندهار کې یې هم پر یو کس د دُرو حکم پلی کړی دی.
د یادونې ده چې طالبانو په تېرو درېیو ورځو کې په خوست، کندهار او فاریاب کې یو شمېر کسان د «دوکې او نامشروع اړیکو» په تور په دُرو وهلي دي.
له دې وړاندې د طالبانو مشر ملا هبتالله اخوندزاده په عام محضر کې تورنو ته پر سزا ورکولو ټينګار کړی و.
