د طالبانو بهرنیو چارو وزارت رفح کې د بېځایه شویو فلسطیني کډوالو پر یو کمپ د اسراییل هوايي برید چې لامله یې ۴۵ کسان ووژل شول، په کلکو ټکو غندلی دی.
دغه وزارت دوشنبه د غبرګولي پر ۷مه په یوې خپره کړې خبرپاڼه کې دا برید «نسلوژنه» بللې او ویلي دي چې دا د اسرايیل د جنګي تګلارې یوه برخه ده.
د یادونې ده چې د غزې په سوېلي ښار رفح کې د بېځایه شویو فلسطیني وګړو پر یو کمپ د اسراییل په هوايي برید کې د ښځو او ماشومانو په ګډون ګڼ کسان وژل شوي.
د اسراییل دا برید په نړیواله کچه له پراخو غبرګونونو سره مخ شوی دی.
اسراییلي پوځ بیا ویلي چې په دغو هوايي بریدونو کې یې د حماس دوه جګپوړي مشران وژلي.
متحده عربي اماراتو په یوې خپره کړې خبرپاڼه کې د دغه برید غندنه کړې او د عدالت نړیوالې محکمې د پرېکړې پر پلي کولو یې ټينګار کړی چې پر رفح د برید بندولو غوښتنه پکې شوې ده.
