په قطر کې د طالبانو سفیر سهیل شاهین یو ځل بیا له ملګرو ملتونو غوښتی چې د افغانستان څوکۍ باید طالبانو ته وسپارل شي.
نوموړي ویلي، د دوی رژیم د افغانانو “واقعي استازی” دی او د ملګرو ملتونو د اعتبار کمېټه باید “انصاف او جغرافیايي واقعیتونه” په پام کې ونیسي.
خو ملګري ملتونه لا هم طالبان د غړیتوب د شرطونو نهپوره کوونکي بولي، ځکه هغوی د بشري حقونو، ښځو د زده کړو او کار، او د بیان د ازادۍ محدودولو له امله تر نیوکې لاندې دي.
د افغانستان مدني فعالان هم له دې سازمانه غواړي، چې د هېواد څوکۍ د طالبانو په واک کې ورنه کړي، او اوسمهال دا څوکۍ د پخواني حکومت استازي نصیر احمد فایق سره ده.
